Runavíkar kommuna væntar at fáa 312 mió. kr. í skatti næsta ár

Skattaprosentið í Runavíkar kommunu verður tað sama næsta ár sum í ár.

Tað er 21,5 prosent.

Barnafrádrátturin verður 10.500 krónur. Hann er eisini 10.500 kr. í ár.

Runavíkar býráð hevur samtykt fíggjarætlanina fyri 2026. Fyrra viðgerð var í gjár.

Verandi rakstur verður fýra prosent dýrari í 2026. Og so kemur svimjihøllin aftrat.

Íløgur fyri 35 mió.

Íløgur skulu gerast fyri 34,9 mió. kr.

Skuldin hjá Runavíkar kommunu er 86 prosent av skuldarloftinum.

Í uppskotinum um fíggjarætlan er eingin lántøka í 2026. Og ætlanin er at minka skuldina 26 milliónir.

Kommunan væntar at fáa 311 milliónir og 900.000 kr. í skatti næsta ár.