Ógreitt hvar nýggju aðalráðini skulu húsast

Enn er ikki greitt, hvar nýggju aðalráðini skulu húsast, nú løgmaður hevur gjørt av, at bara seks aðalráð skulu vera og ikki níggju eftir 1. desember. 

John Rajani, løgmansstjóri, sigur í skrivligum boðum til Kringvarpið, at arbeitt verður við eini samlaðari tilgongd, har m.a. staðsetingarnar hjá nýggju aðalráðunum verður viðgjørd 

Løgmansstjórin sigur, at arbeiðið við staðsetingunum er um at vera liðugt, og kunnað verður um hetta í næstum.

Eirargarður 2 til næmingabústaðir

Tað var greitt í summar, at Eiragarður 2 skal gerast til næmingaíbúðir, og tí skulu Almannamálaráðið og Heilsumálaráðið flyta úr bygninginum. 

Í summar var kunngjørt, at Almanna- og Mentamálaraðið skal yvirtaka leigumálið hjá Arbeiðs- og Brunaeftirlitinum og Tunnilsfelagnum á Bryggjubakka, og Heilsumálaráðið fer hagar, sum Lív var.

Men nú eru hesi ráðini løgd saman, og tí er ivasamt, hvat hendir.

Aðrar samanleggingar eru eisini, sum ávirka staðsetingar. Til dømis leggja Fiskimálaráðið og Vinnumálaráðið saman, og málsøkið samferðsla fer undir Fíggjarmálaráðið.