VIDEO: Soleiðis steðgaði Attingré Føroyum

Størsta einstaka grundin til, at Føroyar ongantíð komu heilt nær í fyrsta HM--dystinum ímóti Montenegro í gjár, stóð í málinum hjá mótstøðuliðnum.

Ferð eftir ferð spældu føroyingarnir seg til góðar kjansir, men ferð eftir ferð bjargaði Armelle Kelly Attingré skotunum, sum komu úr øllum ættum. Stóri málverjin tók 17 av teimum 38 skotunum, sum komu, meðan hon var inni. Tað svarar til eitt bjargingarprosent upp á 45.

Á hagtølunum sæst greitt, at Føroyar spældu seg til fleiri sløg av kjansum, men málverjin stóð sum heild stinnur. Av veinginum tók hon seks av 11 skotroyndum - tað eru kanska torførasta skotstøðan eisini - men hon tók eisini fýra av níggju skotum eftir føroyskt gjøgnumbrot, tá kjansirnir ofta eru eitt sindur størri mitt fyri.

Í samandráttinum niðanfyri síggjast fleiri dømir upp á bjargingar av alskyns slag.

Annika bjargaði eisini

Armelle Kelly Attingré er 36 ár úr Budocnost, men er nýggj á landsliðnum. Spældi við Fraklandi frá 2010 til 2014. Hon fekk 5. pláss við Fraklandi til EM 2014. Hon hevur spælt við Montenegro síðani í fjør og stóð seg væl til EM 2024.

Hon var kortini ikki einasti málverjin, sum stóð seg væl í dystinum. Annika Fríðheim Petersen, sum ikki hevur spælt í nærum eitt ár vegna barnsburð, fekk kjansin tíðliga í dystinum mikukvøldið, og stóð sera væl.

Hon bjargaði átta av 19 skotum, sum svarr til 42 prosent, og eina løtu helt hon Føroyum inni í dystinum.