- Tað varð tungt ígjøgnum 60 minuttir

Føroyar máttu lúta við tíggju málum, 36-26, móti Týsklandi í fyrsta umfari av miðumfarinum, sum byrjaði í Westfalenhalle í Dortmund í dag.

Týska liðið var væl smurt, og tað var torført hjá føroyingunum at standa ímóti trýstinum frá heimaliðnum ígjøgnum dystin.

 - Tað var hart og ein stór uppliving. Vit møta einum sera góðum liði í dag, segði Pernille Brandenborg eftir dystin frammanfyri umleið 10.000 áskoðarum.

Føroyar byrjaðu báðar hálvleikirnar væl, men sum leið út, gjørdurst mistøkini fleiri, meðan verjan ikki fekk steðga góða týska álopsspælinum. 

 - Vit spæla okkum til nógvar góðar kjansir í byrjanini við sjey ímóti seks, tá vit fáa flutt tær eitt sindur. Í verjuni fáa vit ikki ordiliga fatur á teimum, sum vit høvdu vilja, segði liðskiparin, sum skeyt fimm mál upp á seks royndir í dag.