Samráðast enn um fiskiveiðiavtalu

Einki fæst at vita um fiskiveiðusamráðingarnar við Russland, sum byrjaðu seinasta mánadag, og sum halda fram í dag. Men enn verður samráðst.

Samráðingarnar millum partarnar steðgaðu fyribils tollaksmessudag, og partarnir avtalaðu tá, at hittast aftur í dag.

Samráðst var 22. og 23. desember á talgildum palli.

Eirikur í Jákupsstovu, landsstýrismaður í tilfeingis- og vinnumálum, segði í skrivligum boðum tollaksmessudag, at samráðingarnar gingu væl, og at málið var at fáa eina avtalu í lag.

Landsstýrismaðurin segði, at samráðingarnar hava gingið væl. 

- Tað gongur altíð seinni, tá samráðingar eru á talgildum palli, skrivaði hann eisini.

Seinastu árini hava hesar samráðingarnar tikið 4-5 dagar, og dagurin í dag er triði dagur higartil.

Landsstýrismaðurin skrivar í sms-boðum fyri løtu síðani, at hann ongar viðmerkingar hevur, meðan samráðingar eru. Hann sigur bara at samráðst verður enn.