Málið um valsvik: Ákæruvaldið krevur í minsta lagi fýra mánaða fongsul

Ikki undir fýra mánaða fongsulsrevsing.

Tað krevur ákæruvaldið í málinum um valsvikið á kommunuvalinum í 2024 í Oyndarfirði.

Verjin, Christian Andreasen, krevur frídøming, ella at dómurin verður treytaður.

Dómarin segði, at dómurin kemur klokkan eitt í dag.

Ákærin, Sarah Ann B.Vinther, nevndi nógv prógv um, at valstýrisformaðurin hevur framt valsvik.

Hon segði, at tað merkti nógv vitni, at tey kennast, og at tey kenna ákærda valstýrisformannin.

Tíggju vitni, tíggju veljarar í Oyndarfirði, vóru avhoyrd í gjár.

Verjin: Eingi prógv

Verjin segði, at ákæruvaldið hevur eingi prógv yvirhøvur. Teknisku frágreiðingarnar í málinum kunnu ikki staðfesta, hvør hevur sett tann seinna krossin á valseðilin í Oyndarfirði, og heldur ikki, um tað eru tvey ella sama fólk.. 

Og allur ivi eigur at koma ákærda til góðar, segði verjin.

Málið er í stuttum tað, at tá ein atkvøða í Oyndarfirði kom til finteljingar í Runavík, var hon gjørd ógildug, tí har var meira enn ein krossur á.

Tá tær 92 atkvøðurnar í Oyndarfirði vóru taldar, var eingin atkvøða gjørd ógildug.

Tvey valevni lika nógvar atkvøður

Valstýrisformaðurin var ákærdur fyri at gera atkvøðuna ógilduga. Hetta gjørdi, at tvey valevni fingu líka nógvar atkvøður. 

Og tann, sum átti ógilduga atkvøðuna, og tí í fyrsta umfari vann, tapti lutakastið, og kom ti ikki í býráðið.

Hetta er fyrsta mál um valsvik hja dómsvaldinum í Føroyum.

Í Danmark eru tvey mál um brot á grein 116 í revsilógini um valsvik, annað er frá 1977 og hitt frá 2006.

Men tey líkjast ikki hesum í Føroyum. Dómarnir í teimum málunum vóru 60 dagar og 30 dagar.