Sjáldsamt at bæði fólkatingsumboðini endurvinna sessin

Um minni enn tvær vikur skulu føroyingar aftur á fólkatingsval. 

Anna Falkenberg úr Sambandsflokkinum og Sjúrður Skaale úr Javnaðarflokkinum hava seinastu setuna røkt fólkatingssessirnar. Bæði hava boðað frá, at tey stilla upp aftur til fólkatingsvalið 24. mars.

Men tað er sjáldan, at báðir fólkatingslimirnir endurvinna sessin, skriva valurslit.fo. 

Tað eru heili 45 ár síðani seinast, at føroyingar hava valt somu fólkatingslimir at umboða seg á fólkatingi.

Pauli og Jacob

Á fólkatingsvalinum í 1981 blivu Pauli Ellefsen úr Sambandsflokkinum og Jacob Lindenskov úr Javnaðarflokkinum afturvaldir, eftir at teir eisini vóru valdir í 1979.

Orsøkirnar hava verið ymiskar, hví somu fólkatingslimir ikki hava endurvunnið sín sess. Stundum hevur undirtøkan ikki verið nóg dygg, men eisini eru fleiri dømi, at tey ikki hava stillað uppaftur.

Tað vísir seg tó, at annar fólkatingslimurin - næstan - altíð vinnur annan sessin. 

Síðan 1950 hevur annað av teimum verandi føroysku fólkatingsumboðunum altíð endurvunnið sessin á Christiansborg - við bara einum undantaki, skriva valurslit.fo.