EM-plássið upp á spæl í grannauppgerð

Eitt pláss í EM-endaspælinum stendur upp á spæl, tá føroysku hondbóltskvinnurnar taka ímóti Íslandi við Tjarnir í annaðkvøld.

 - Vit kenna okkum væl. Vit halda, at vit hava klárt tann besta heimavøllin í bólkinum, og eg vænti, at tað er torført at koma her at spæla, tí vit hava so stóran stuðul. Hann vóna vit at brúka til at fáa yvirtakið á Íslandi, segði liðskiparin Pernille Brandenborg áðrenn venjingina hjá Føroyum týsdagin.

Talan er um tvey lond, sum kenna hvønn annan væl eftir nógvar innanhýsis dystir síðstu árini. Føroyar vunnu á grannunum í fyrsta dystinum í EM-undankappingini í oktober - einasti føroyski sigurin á Íslandi higartil - men síðan hevur Ísland vunnið tvær ferðir - í venjingardysti og í HM-endaspælinum í Týsklandi.

 - Vit skulu royna, at gera okkum dælt av, at vit kennast væl. Styrkir og veikleikar, tí vit vilja sera fegnar vera best nú, segði sterki strikuspælarin.

Vinna Føroyar, er EM-plássið mestsum tryggjað, men tapa tær, verður avgerðin útsett til síðsta leikdag sunnudagin, tá Montenegro er vertur hjá føroyingunum.

Kringvarpið sendir báðar dystirnar hjá Føroyum. Í morgin verður byrjað klokkan 18.30.