Skulu ikki longur gera tvær konjukturfrágreiðingar um árið

Búskaparráðið skal ikki longur gera tvær konjunkturfrágreiðingar um árið.

Í staðin skal ráðið gera ein konjukturfrágreiðing um várið og eina árliga temafrágreiðing um heystið.

Aksel V. Johannesen, landsstýrismaður í fíggjarmálum, sigur, at broytingin hevur við sær, at konjunkturfrágreiðingin verður gjørd beint fyri, at játtanarkarmarnir skulu leggjast fram 1. apríl.

At leggja konjunkturfrágreiðing fram 1. mars hóskar betur, tí tá fær Búskaparráðið gjørt greiningar við støði í nýggjum hagtølum frá Hagstovuni.

Temafrágreiðing um heystið

Seinna konjukturfrágreiðingin 1. september verður strikað. Í staðin skal Búskaparráðið gera ein temafrágreiðing um árið.

Temafrágreiðingar hyggja nærri at búskaparliga bygnaðinum, og ráðgeving um bygnaðarligar broytingar er eisini ein neyðug og týðandi uppgáva, stendur í viðmerkingunum til uppskotið. 

Uppskotið er gjørt í samráði við Búskaparráðið og Landsbankan, og hevur ikki verið til hoyringar.

Les uppskotið her.