Royna matarskipan í skúlum í Tórshavnar kommunu

Fólkaskúlanæmingar í Tórshavnar kommunu skulu nú fáa heilsugóðan og dygdargóðan mat mitt á degi hvønn skúladag.

Tað skrivar Tórshavnar kommuna á heimasíðuni.

Í fyrstu atløgu vera umleið 500 næmingar partur av royndarverkætlanini. Tað eru næmingarnir í grunddeildini í Eysturskúlanum, á miðdeildini í Skúlanum á Fløtum og allir næmingarnir í Kollafjarðar skúla.

Gera matin á Skúlanum á Fløtum

Kommunan skrivar, at tann sokallaði framleiðslukøkurin á Skúlanum á Fløtum skal gera matin, og haðani verður maturin fluttur til hinar skúlarnar. 

Eysturskúlin fær umstøður til at borðreiða og eta, og Kollafjarðar skúli er partur av verkætlanini, so royndir verða gjørdar við logistikki. 

Ein arbeiðsbólkur hevur kannað møguleikan við matarskipan, og kanningin vísir, at stórur áhugi er fyri matarskipan, har næmingarnir fáa heitan ella kaldan mat í skúlanum, og nógv eru eisini sinnað at rinda fyri skipanina. 

Arbeitt verður við eini skipan, sum partvís er fíggjað við brúkaragjaldi.

Í næstum verður søkt eftir køksleiðara at standa á odda fyri verkætlanini, skrivar kommunan.