Heilsustýrið: Lítil vandi fyri, at ebolasmittan kemur til Føroya

Fólk, sum ferðast til og úr Kongo og Uganda, eiga at halda seg dagførd á heimasíðuni hjá danska uttanríkisráðnum, um.dk, sigur Heilsustýrið.

Orsøkin er ebolavirus.

Fólk, sum hava verið í Kongo og Uganda, og fáa fepur ella onnur sjúkutekin innan 21 dagar eftir, at tey vóru har, eiga at ringja til lækna og upplýsa ferðasøguna.  

Ebola smittar bara, tá sjúkutekin eru.

Ebola smittar við beinleiðis sambandi við sjúk fólk ella djór, ella beinleiðis sambandi við blóð ella aðra kropsvætu frá einum sjúkum.

Enn er eingin smitta staðfest uttan fyri økið, har sjúkan er. 

Heimsheilsustovnurin, WHO, metir tó, at vandin fyri smittubreiðslu í landspartinum í Miðafrika er stórur. 

Evropeiski smittuverjustovnurin, ECDC, og danskir heilsumyndugleikar meta, at vandin fyri smittubreiðslu til Danmarkar og ES yvirhøvur er sera lítil. 

Heilsustýrið metir, at vandin fyri, at ebolasmittan kemur til Føroya, eisini er sera lítil.