Ráðførir seg um dupultskattaavtalu við Grønland

Fyrrapartin í dag fer Jørgen Niclasen, landsstýrismaður í fíggjarmálum, at ráðføra seg við Uttanlandsnevndina hjá løgtinginum um ætlaðu broytingarnar í dupultskattavtaluni millum Føroyar og Grønland.

Broytingar í dupultskattaavtaluni vóru millum annað endamálið við ferðini hjá Jørgeni Niclasen til Grønlands í fjør summar.Sambært føroyska Fíggjarmálaráðnum ger galdandi avtala, at føroyskar fyritøkur í Grønlandi fáa ikki kappast á jøvnum føti við fyritøkur úr øðrum londum, serliga úr Danmark, Noregi og Íslandi.

Til Føroya á vitjan

Tá Jørgen Niclasen var í Grønlandi, avtalaðu hann og grønlendski starvsfelagi hansara at hittast aftur í Føroyum nú í januar at halda fram við tingingunum um dupultskattaavtaluna og samstarv annars um skatt og búskaparskipan.

Vittus Qujaukitsoq, landsstýrismaður í fíggjarmálum og innlendismálum, kemur til Føroyum á almenna vitjan seinni í hesum mánaðinum. Hann skal eisini til Íslands. Uttanlandsferðin hjá grønlendska landsstýrismannium byrjar í dag og varar til 16.januar.