Níggju fólk latið lív í russiskum álopum á Kyiv

Minst níggju fólk hava latið lív og minst 46 eru løstað í russiskum álopum á ukrainska høvuðsstaðin Kyiv í nátt.

Russar herjaðu á við bæði rakettum og dronum, og sambært ovastanum fyri hernaðarleiðsluna í Kiev, Tymur Tkatjenko, vóru fleiri íbúðarbygningar og aðrir bygningar raktir.

Tað er tíðindastovan AFP, sum hevur tosað við Tymur Tkatjenko á bronglaðu - ella krypteraðu - tíðindatænastuni Telegram.

Hann sigur, at fimm børn eru millum tey særdu eftir álopini, og hann stúrir fyri, at talið av deyðum og særdum kann vera størri, enn almennu tølini siga nú, meðan bjargingararbeiðið enn er í gongd.

Hetta er aðru ferð í minni enn eina viku, at Russland fremur ógvislig og deyðilig álop á Kyiv.

Ukrainski forsetin, Zelensky, ávaraði í gjárkvøldið um, at russar sambært ukrainskum fregnum fór at leypa á aftur í nátt.