Farin sína seinastu uttanlandsferð sum forsætisráðharri

Fráfarandi forsætisráðharrin í Bretlandi, Keir Starmer, er í dag farin til Ukraina, har hann skal hitta ukrainska forsetan, Volodymyr Zelensky.

Hetta verður seinasta uttanlandsferðin hjá Starmer sum forsætisráðharri, tí í næstu viku leggur hann frá sær. Andy Burnham tekur við sum formaður í Labour í morgin og sum forsætisráðharri mánadagin.

Hildið verður, at Starmer fer at endurtaka lyftið frá Bretlandi um stuðul til Ukraina, og at stuðulin heldur fram - eisini um broytingar verða í bretsku stjórnini.

Starmer boðaði 22. juni frá, at hann leggur frá sær. 

Avhildin úti í heimi

Hóast minkandi undirtøku í Bretlandi, er hann avhildin sum forsætisráðharri úti í heimi, har nógvir ríkisleiðarar hava gott at bera honum, - serliga fyri stuðulin til Ukraina og í Nato.

Starmer og franski forsetin Emmanuel Macron hava gingið á odda í fyrireikingunum til friðarvarðveitandi herdeildir, sum skulu sendast til Ukraina, tá ið ein friðaravtala er komin í hús.

Bretland verður eisini við í stóra láninum, sum ES samtykti mánadagin, - at veita Ukraina 90 milliardir evrur í láni.

Tað svarar til góðar 672 milliardir krónur.