Taka saman um støðuna við vaktarskipunum í dag

Seinnapartin fer Vørn at taka saman um støðuna, nú bæði vaktar- og bjargingarskipini eru tikin úr sigling.

Brimil er tikin úr sigling, tí stórt viðlíkahalds- og umvælingararbeiði skal gerast á skipið.

Og Tjaldrið, sum skuldi røkja uppgávuna fyri Brimil, liggur við maskinbreki.

- Vit hava ein ávegis statusfund seinnapartin, og eftir tann fundin hava vit eina greiðari mynd av støðuni, sigur Jóhan Simonsen, virkandi stjóri á Vørn.

Ógreitt hvussu stórt brekið er

Enn er ógreitt, hvussu umfatandi maskinbrekið á Tjaldrinum er, og nær skipið siglir aftur.

Tað tekur eisini tíð, um Brimil skal setast aftur í sigling. Nógv útgerð er tikin úr skipinum, nú viðlíkahalds- og umvælingararbeiði skal gerast.

Vørn hevur biðið Arktisk Kommando um at hjálpa til við vaktar- og bjargingartænastuni, nú bæði skipini hjá Vørn liggja. Arktisk Kommando hevur í løtuni eitt skip við Føroyar.