Stoltenberg tekur seg aftur sum oddamann fyri altjóða trygdarráðstevnu

Jens Stoltenberg, norski fíggjarmálaráðharrin og fyrrverandi aðalskrivari í Nato, fer kortini ikki at standa á odda fyri altjóða trygdarráðstevnuni í München.

Stoltenberg sigur við blaðið Dagens Næringsliv, at hann heldur vil hugsavna seg um norskan politikk.

- At vera fíggjarmálaráðharri í Noregi, hevur størri týdning fyri meg enn at standa á odda fyri einari ráðstevnu í München. Eg hámeti Noreg, eri áhugaður í norskum politikki og sinnaður at halda fram, sigur Jens Stoltenberg.

Av teirri orsøk eru partarnir vorðnir samdir um, at Stoltenberg ikki skal standa á odda fyri ráðstevnuni.

Árlig stevna

Altjóða trygdarráðstevnan í München er á hvørjum ári. Tá hittast stjórnarleiðarar, ráðharrar, serfrøðingar, granskarar og umboð fyri felagsskapir úr øllum heiminum at viðgera trygdar- og verjupolitikk.

Aksel V. Johannesen, fyrrverandi løgmaður, var við á ráðstevnuni í ár. Hann var millum annað við á pallborðsfundi um trygd í Arktis.

Hendan ráðstevnan var fyrstu ferð í 1963. Landsstýrið er boðið við tríggjar ferðir.