Betri trygging 74 milliónir í avlopi fyrra hálvár

Betri trygging hevði 74 milliónir krónur í avlopi eftir skatt fyrra hálvár í ár.

Tað er meira enn tvífalt so nógv sum fyrra hálvár í fjár, tá avlopið var 34 milliónir.

Orsøkin til úrslitið er fyrst og fremst færri og minni skaðar.

500 færri skaðar

Skaðarnir eru 500 færri í tali, og skaðaendurgjøldini kostaðu 74 milliónir krónur minni. Tey fóru úr 195 milliónum fyrra hálvár í fjør, niður í 121 milliónir fyrra hálvár í ár. 

Men inntøkurnar eru tær somu - 274 milliónir í ár móti 279 milliónum í fjør.

Samanumtikið var munurin millum tryggingarinntøkur og skaðaendurgjøld 153 milliónir fyrra hálvár í ár.

Fyrra hálvár í fjør var munurin 84 milliónir krónur.