Géza fekk blátt eyga: - Tað nyttar ikki at grenja um tað

Géza Dávid Turi var í miðdeplinum, tá Føroyar sluppu við skrekkinum og einum stigi úr Moldova.

Miðvallarin varð bæði sparkaður og skallaður og fór av vøllinum við einum bláum eyga. Tað góða var, at tað einu ferðina, vann hann Føroyum brotssparkið, sum Viljormur Davidsen umsetti til 1-0 málið.

 - Tað var luftduell, og maðurin skallar meg í høvdið. Tú mást bara koyra víðari. Tað nyttar ikki at granja um tað, segði Géza Dávid Turi.

Hann og Mattias Hellisdal vóru í undirtali ímóti trímansmiðvøllinum hjá moldavum, sum stýrdu dystinum fyri tað mesta, og vóru nær við at avgera dystin við skotum frá Sergiu Percuin, sum eisini sendi eitt framúr útjavnandi fríspark í netið. 

 - Vit kláraðu at lukka teir niður til eitt vist, men teir høvdu handan níggjaran, sum skeyt nøkur skot. Tú kanst næstan einki gera við hasi, segði Géza Dávid Turi.