Friðaravtala í Ukraina

Friðaravtalan ber í sær, at forsetaval verður í næstum, og innan 10 samdøgur skal ein skiftisstjórn verða skipað.

Avtalan sigur eisini, at broytingar skulu gerast í grundlógini, og tær skulu setast í verk í seinasta lagi í september.

Sambært Reuters fara grundlógarbroytingarnar at hava við sær, at forsetin missir vald.

Friðaravtalan er komin í lag eftir samráðingar í nátt millum Janukovitj, forseta, og umboð fyri andstøðuna. Uttanríkisráðharrarnir í Týsklandi, Fraklandi og Póllandi, sum komu til ukrainska høvusstaðin Kijev í gjár, vóru semingsmenn.

ES-uttanríkisráðharrarnir samtyktu í gjár at seta tiltøk í verk móti Ukraina, men tíðindafólk í Brússel siga, at nú avtala er fingin í lag, kann vera, at tiltøkini ikki verða so strong.

Ófriðurin í Kijev seinastu dagarnar hevur kravt í minsta lagi 70 mannalív, og fleiri enn 500 eru særd.