Løn í summarfrítíðini gevur einki frítíðarískoyti

<p>Løntakarar fáa ov nógv í frítíðarískoyti.</p>

<p>Sambært lógini um frítíð við løn skal frítíðarískoyti ikki gjaldast av løn, sum verður goldin í frítíðini. Fólk, sum hava summarferiu við løn, eiga tí ikki rætt til frítíðarískoyti.</p>

<p>Tað sigur Kári P. Højgaard, løgtingsmaður, sum spurdi Jørgen Niclasen, landsstýrismann í fíggjarmálum um hetta. Kári P. Højgaard spurdi, um almennar lønarumsitingar umsita lógina rætt.</p>

<p><strong>1,5 prosent</strong></p>

<p>Jørgen Niclasen svarar, at sambært Gjaldstovuni verður frítíðarískoyti, sum er 1,5 prosent, eisini goldið av løn í feriu. Ikki bara landið ger tað, men eisini Tórshavnar kommuna, aðrar kommunur og SEV, sigur Jørgen Niclasen.</p>

<p>Meirkostnaðurin hjá landinum er mettur at vera um tvær milliónir krónur um árið. Jørgen Niclasen sigur eisini, at frítíðarlógin er málsøki hjá Vinnumálaráðnum.</p>

<p>Og Jørgen Niclasen veit ikki, um ítøkiligar ætlanir eru um at broyta frítíðarlógina, so lógin sigur, at fólk eisini eiga frítíðarískoyti fyri lønina, tey fáa, meðan tey hava summarfrí. Jørgen Niclasen leggur afturat, at frítíðarlógin er ein minimumslóg, ein lágmarkslóg. Tað er tí ikki í stríð við lógina at gjalda meira enn 1,5 prosent í frítíðarískoyti.</p>

<p><strong>Fáa 433 kr. ov nógv</strong></p>

<p>Sambært svarinum hjá landsstýrismanninum í fíggjarmálum fáa starvsfólk, sum tjena 25.000 kr. um mánaðin, 433 krónur ov nógv í frítíðarískoyti um árið. Landsstýrismaðurin fer nú at kanna, hvussu nógv, tað kostar í umsiting at broyta mannagongdina, so hon svarar til lógina.</p>