Privatu fjølmiðlarnir fáa pengar úr landskassanum

Privatu fjølmiðlarnir eru nú komnir í fíggjarlógina. 

Í fíggjarlógaruppskotinum, sum løgtingið fær týsdagin, eru pengar settir av til privatu fjølmiðlarnar.

Tað upplýsti Bjørn Kalsø, landsstýrismaður í mentamálum, á pallborðsfundi í Havn í gjárkvøldið.

Samstundis hevur landsstýrismaðurin mist alla vón um at fáa undirtøku í samgonguni fyri at hjálpa Kringvarpinum fíggjarliga.

Ikki politikarar

Bjørn Kalsø fekst ikki at siga, hvussu nógvar pengar, hann hevur biðið um til privatu miðlarnar. Men miðlarnir skulu fáa pengar til útbreiðslu og til redaksjónirnar.

Leiðreglur skulu gerast um, hvussu pengarnir skulu býtast millum miðlarnar. Og tað verða ikki politikarar, sum skulu býta teir, segði Bjørn Kalsø.  

Landsstýrismaðurin segði, at við at umraðfesta í kontunum hjá Mentamálaráðnum í fíggjarlógini hevur hann funnið pengar til privatu fjølmiðlarnar.

Hann segði seg hava undirtøku fyri hesum í samgonguni.

Men slíka undirtøku hevur hann ongantíð havt, hana hevur hann heldur ikki nú og væntar heldur ikki at fáa hana, tá tað ræður um at hjálpa Kringvarpinum.

Ætlanin at geva Kringvarpinum pengar afturfyri, at Kringvarpið gevst at senda lýsingar, er kollsigld í samgonguni. Og tað er ætlanin um at lata Kringvarpinum meirvirðisgjaldið av kringvarpsgjaldinum eisini.

Samgongan vil ikki

Bjørn Kalsø segði bart út á pallborðsfundinum, at hann hevur mist alla vón um at fáa fjølmiðlapakkan, sum hann hevur arbeitt við í langa tíð, góðkendan í samgonguni. Og hann torir ikki at fara í løgtingið við honum, tí tað kann enda við, at støðan hjá Kringvarpinum verður verri, enn hon er nú. 

Og sambært landsstýrismanninum í mentamálum sleppur Kringvarpið at halda fram við at senda lýsingar.