Er nú frídømdur í øllum fýra ákærum um ágang

Eystari landsrættur hevur frídømt ein mann fyri at gera seg kynsliga inn á eina gentu.

Maðurin varð upprunaliga ákærdur fyri í fýra førum at hava framt kynsligan ágang móti gentuna, sum tá, í 2004 og 2005, var yngri enn 15 ár.

Í Føroya rætti varð maðurin frídømdur fyri tríggjar ákærur og dømdur fyri eina.

Hann fekk seks mánaða treytaleysa fongulsrevsing.

Fór í Landsrættin

Men maðurin skeyt dómin inn fyri Eystara landsrætti, sum viðgjørdi málið mikudagin.

Landsrætturin viðgjørdi bara tað eina lógarbrotið - brotið, sum maðurin varð dømdur fyri í Føroya rætti. 

Ákæruvaldið appelleraði ikki frídømingina hjá Føroya rætti í hinum trimum lógarbrotunum, maðurin var ákærdur fyri.

Landsrætturin sigur, at tað er ikki prógvað, at maðurin er sekur í ákæruni, sum var eftir. Tí er maðurin frídømdur.