Gera enn eina roynd at semjast

Tríggir dagar eru settir av til samráðingarnar, sum eru í Edinburgh. Føroyar hava formansskapin í hesum samráðingunum, og hetta er fimti fundurin um svartkjaftin síðani í oktober í fjør, tá Føroyar fingu formansskapin.

Londini eru samd um alt viðvíkjandi svartkjaftinum uttan býtislykilin. Men hann er rættiliga avgerandi, tí býtislykilin sigur, hvussu heildarkvotan skal býtast millum londini.

So leingi semja ikki er um býtislykil, ásetir hvørt landið sær sína kvotu. Svartkjafturin er væl fyri, og londini eru samd um, at heildarkvotan í ár er ein millión og 260.000 tons. Men londini eru als ikki samd um, hvussu nógv, hvørt landið eigur av heildarkvotuni.

Ísland hevur tikið sær 215.000 tons í ár. Higartil eru fiskað 152.000. Íslendsk skip fiskaðu 94.000 tons av svartkjafti í føroyskum sjógvi í mai.