Nýtt uppskot gjørt um fiskavirkisskipanina

Mikudagin fær Johan Dahl, landsstýrismaður, nýtt uppskot frá ALS um kunngerð um fiskavirkisskipanina.

ALS-stýrið hevur gjørt eitt nýtt uppskot í staðin fyri uppskotið, sum Johan Dahl sendi til hoyringar fyrr í ár.

Semja var ikki í stýrinum um tað uppskotið, sum segði, at uppsjóvarvirki og kryvjivirki skuldu ikki vera við í fiskavirkisskipanini.

Mett varð, at tað uppskotið fór at spara ALS átta til tíggju mió. kr. um árið.

Full semja

Eyðfinnur Jacobsen, formaður í ALS-stýrinum, sigur, at full semja er um nýggja uppskotið, sum landsstýrismaðurin fær mikudagin.

Stýrisformaðurin vil ikki siga, hvat stendur í nýggja uppskotinum, áðrenn landsstýrismaðurin hevur fingið tað.

Sparingin verður tó ikki so stór sum í fyrra uppskotinum. 

Men tað bilar ikki nú. Støðan hjá ALS er vorðin frægari enn hon var, tí arbeiðsloysið er so lítið. Nú veksur í kassanum hjá ALS aftur, sigur Eyðfinnur Jacobsen.  

20 mió. kr. um árið 

Útgjaldið úr Fiskavirkisskipanini er oman fyri 20 milliónir krónur um árið. 

Sambært ALS høvdu 17 prosent av teimum, sum í fjør fingu pengar úr fiskavirkisskipanini, meira enn 300.000 kr. í ársinntøku.