Mælir grønlendingum til at brúka meira pening

- Grønlendingar eiga at spara minni og brúka meira. Tað sigur stjórin í Grønlandsbankanum, Martin Kvistgaard, eftir at grønlendska hagstovan hevur kunngjørt konjukturhagtølini fyri annan ársfjórðing.

Peningastovnarnir halda, at bæði fyritøkur og einstaklingar spara nógv saman. Annaðhvørt gjalda tey avdrátt av lánum, ella seta tey meira inn, sambært stjóranum í Grønlandsbankanum.

- Tað hevur við sær, at menningin í samfelagnum steðgar, sigur Martin Kvistgaard, stjóri í Grønlandsbankanum, við grønlendska kringvarpið, KNR.

Privat- og vinnukundar eiga at gera íløgur

Martin Kvistgaard heldur, at gongd eigur at verða sett á búskapin, og at bæði privatkundar og vinnukundar eiga gera íløgur.

Sambært tølunum hjá grønlendsku hagstovuni er ov tíðliga at siga, um búskaparliga støðan í Grønlandi fer at batna í ár. Men grønlendski landskassin hevur fingið nógv meira í tolli á innfluttum motorakførum í ár.

Vøksturin er sløk 73 prosent samanborið við somu tíð í fjør. Og bilinnflutningurin merkist eisini í Grønlandsbankanum, tí meira verður lænt, sigur Martin Kvistgaard.