USA ávarar Russland um at halda seg úr Sýria

Amerikanski uttanríkisráðharrin John Kerry sigur seg stúra fyri, at Russland roynir at styrkja hernaðarliga leiklut sín í Sýria.

Amerikanskir fjølmiðlar siga, at Russland hevur sent hernaðarútgerð og ráðgevarar til Sýria, og í Washington verður hildið, at Russland soleiðis styrkir um støðu sýriska forsetans Bashar al-Assad.

- Slíkt fer bert at gera stríðið enn harðari hevur John Kerry sagt í telefonsamrøðu við russiska uttanríkisráðharranum Sergei Lavrov.

Russland stuðlar sýriska forsetanum

Russland hevur stuðlað Bashar al-Assad, forseta, og stjórn hansara øll árini bæði undan og eftir at borgarakríggið í Sýria brast á fyri fýra árum síðani.

New York times skrivar frá keldum í amerikansku umsitingini, at Russland hevur sent hernaðarserfrøðingar til Sýria og eftirlitsútgerð til ein flogvøll, sum sýriska stjórnin hevur ræðið á, og sum illgruni er um, at russar kunnu ætla at flúgva hernaðarútgerð til.

Russiski forsetin Vladimir Putin vísti fríggjadagin aftur, at Russland skal hava ætlanir um nakran leiklut í borgarakrígnum í Sýria.