Samdir um málsøkini

Javnaðarflokkurin, Tjóðveldi og Framsókn eru liðug við samgonguskjalið og málsøkjabýtið, tað váttar Aksel V. Johannesen, formaður í Javnaðarflokkinum og samráðingarleiðari.

"Vit eru komin ásamt um málsøkjabýtið og samgoguskjalið, og flokkarnir hittast aftur í morgin," sigur Aksel V. Johannesen.

Hann vil tó ikki siga nakað ítøkiligt um hvør flokkur fær hvørji málsøki. Greitt er tó, at Aksel V. Johannesen verður løgmaður.

Men sambært Norðlýsinum so fær Tjóðveldi fiskivinnumál og fíggjarmál, meðan Framsókn fær vinnumál.

Nývalda løgtingið kemur saman fyrstu ferð týsdagin. Á fundinum týsdagin skulu valbrøvini og valúrslitið góðkennast, síðan skal løgtingsformaður veljast, og eisini skulu tríggir næstformenn tilnevnast at vera í formansskapinum saman við løgtingsformanninum.

Væntandi verður tíðindafundur í morgin, har samgonguskjalið verður skrivað undir, og almannakunngjørt verður, hvørji eru nýggj landsstýrisfólk.