Undrast á kostnaðin til umsiting

Eisini Fíggjarnevndin hjá løgtinginum undrast á, at tað kostar tvær milliónir krónur at umsita góðar 8,3 mió. kr. Nevndin hevur tí spurt Eyðgunn Samuelsen, landsstýriskvinnu, um hetta.

Talan er um lógaruppskotið um at hjálpa húskjum, sum eru illa fyri fíggjarliga og tí skulu fáa pengar úr landskassanum.

Skipanin er tung at umsita, og tí kostar umsitingin nógv, svarar landsstýriskvinnan. Inntøkan hjá húskinum avger, um húskið, ikki einstaklingurin, er fátækt.

Umsóknir mugu viðgerast manuelt

Í Føroyum er eingin skipan, sum sjálvvirkandi umsitur leypandi veitingar, sum verða latnar eftir inntøkuni hjá húskjum. Tí skulu umsóknirnar viðgerast við hond, manuelt.

Stuðulin, sum húskini hava rætt til, broytist, tá inntøkan broytist, til dømis, tá fólk fara hvørt til sítt ella finna saman, tá fólk gevast at arbeiða og fara í skúla ella gerast sjúk.

Nógv onnur viðurskifti skulu eisini takast við, tá stuðulin skal roknast út, so sum ogn og inntøkur.

Eisini verður neyðugt at lata húskjum, sum hava fingið ov lítið, fleri pengar ella krevja pengar aftur frá teimum, sum hava fingið ov nógv, stendur í svarinum, sum Fíggjarnevndin fekk úr Almannamálaráðnum.