Mótstøðuførar bakteriur hótta

Ein nýggj frágreiðing slær fast, at í 2050 fara 10 milliónir fólk at doyggja av mótstøðuførum bakterium. Tí verður mælt til, at fleiri milliardir dollarar verða játtaðar til læknavísindina, um læknavísindin ikki skal enda í miðøldini, skrivar BBC.

- Neyðugt er at endurskoða háttin sum antibiotika verður nýtt uppá, og fólk mugu lærast at handfara heilivágin, leggja granskarar dent á.

- Gera vit ikki tað sum er neyðugt fyri at broyta gongdina, so koma vit ikki úr stað, sigur Jim O´Neill, lordur, sum hevur staðið á odda fyri kanningini.

Hann sigur seg bera ótta fyri, at 390.000 fólk í Europa fara at doyggja av mótstøðuførum bakterium í 2050.

Mótstøðuførar bakteriur eru seinastu árini vorðin størsta avbjóðingin hjá heilsuverkunum í okkara tíð.

Sum støðan er, doyggja 25.000 fólk í Europa um árið av bakterium sum eru mótstøðuførar ímóti antibiotika.

Heldur gongdin fram, so fara 350.000 fólk í Europa at doyggja av somu orsøk í 2050. Ringast verður støðan í Asia og Afrika, har ávikavist góðar 4 milliónir og slakar 5 milliónir fólk fara at doyggja av mótstøðuførum bakterium í 2050, stendur í frágreiðingini.