Stórur vøkstur í bilasøluni

Í mai vórðu seldir 218 nýggir persónbilar í Føroyum, 30 fleiri enn sama mánað í fjør. Tað vísa nýggjastu tølini hjá Akstovuni.

Tá øll akfarasløgini verða tikin undir einum, vísa hagtølini hjá Akstovuni, at seld eru til samans 1148 akfør higartil í ár. Tað er 152 fleiri enn somu mánaðir í fjør.

Vøksturin er góð 15 prosent. Brúkt akfør verða eisini innflutt, og fyrstu fimm mánaðirnar eru 12 fleiri brúkt akfør innflutt, 89 í ár og 77 somu tíð í fjør.