Fýra undantaksloyvi latin

Fýra undantaksloyvi eru latin í ár til at taða oman fyri 250 metrar. Umhvørvisstovan gav í apríl trimum festarum í Kaldbaksbotni, á Sundi og á Oyrareingjum loyvi til at taða oman fyri 250 metrar.

Hesi loyvi eru galdandi til 31. august í 2018. Í farnu viku fekk Landsverk loyvi til at taða í Neytaskriðuni á Gjáarvegnum. Freistin at kæra ta avgerðina hjá Umhvørvisstovuni er til 3. august.

Men ein og hvør kann tó ikki kæra. Kærurætt hava tey, sum avgerðin hevur ein týðandi persónligan týdning fyri, sigur Umhvørvisstovan.

SÍ EISINI Tøð týna fjallablómur

Umhvørvisstovan lurtar ikki eftir Náttúrugripasavninum og loyvir bøndrum at spræna mykju oman fyri 250 metrar. Tøðini týna blómur og annan vøkstur, segði Anna Maria Fosaa, savnsvørður á Náttúrugripasavninum, við Dag og viku í gjárkvøldið.

Sambært kunngerðini um taðing frá 2012 er ikki loyvt at taða oman fyri 250 metrar. Umhvørvisstovan kann tó geva undantaksloyvi. Fýra slík undantaksloyvi eru latin í ár, hóast Náttúrugripasavnið ávarar um avleiðingarnar.

Um undantaksloyvið, sum Landsverk fekk, sigur Umhvørvisstovan, at tað hevur týdning at sáða í ben eftir vegargerð fyri at forða fyri erosjón, at lendið máast burtur.

Í loyvinum, Landsverk fekk frá Umhvørvisstovuni, er tó tann treyt, at taðast skal bara á økinum, har sum svørðurin er grivin omanav.