Fleiri løðistøðir setast upp

SEV hevur sett upp skjótløðistøð í Runavík til elbilar. Og í næstum verða tvær løðistøðir á flogvøllinum í Vágum budnar til elnetið.

Seinasta løðistøðin, sambært hesi ætlanini, skal setast upp í Sandoynni. Tað skrivar SEV á heimasíðuni, sev.fo, í dag.

Talan er um skjótløðistøðir, sum eftir 20 minuttum løða bilin upp á 80 prosent, og tað er munandi skjótari, enn eldru løðistøðirnar vóru førar fyri, skrivar SEV.

Fyrsta skjótløðistøðin í Føroyum varð sett upp í Klaksvík stutt undan jólum í 2015. Síðani eru løðistøðir settar upp við Streymin, á Tvøroyri, í Havn og í Vestmanna.