Javnaðarflokkurin ger støðuna upp

Klokkan 13.00 í dag savnar Aksel V. Johannesen Javnaðarflokkin á Gamla Apoteki at gera støðuna upp, eftir at samgongan í fleiri vikur hevur verið í trupulleikum orsakað av ósemju innanfloks um fiskivinnunýskipanina.

Somuleiðis skal Tjóðveldi hittast á Gamla Apoteki klokkan 13.00 í dag at viðgera støðuna og møguleikarnar, sum eftir eru.

Ikki samgonga við Miðflokkin

Seint í gjárkvøldið varð greitt, at samgongan ikki megnar at styrkja seg við atkvøðunum hjá Miðflokkinum, tí samráðingarnar um samstarv við Miðflokkin endaðu úrslitaleysar.

Spurningurin nú er, um uppskotið um nýskipan kann broytast, so at Javnaðarflokkurin kann standa saman um hana, um til ber at dyrgja eftir øðrum flokkum at stuðla uppskotið, ella um Aksel V. Johannesen noyðist at staðfesta, at tað ikki ber til hjá honum at fáa meirluta í tinginum fyri fiskivinnupolitikkinum hjá samgonguni.

Aksel V. Johannesen, løgmaður, kemur í útvarpsstovuna í tíðindasendingini klokkan 12.20.