Vindútboðið í Suðuroy útsett

Vindútboð í Suðuroy er útsett enn eina ferð.

Freistin at søkja um loyvi til elframleiðslu úr vindorku í Porkeri, er fyribils sett til 15. mars 2018.

Tá boð vóru givin um at søkja, var freistin í fyrstu atløgu sett til 15. november í ár, og síðani longd til 15. desember.

Orsøkin til nýggju freistina er, at arbeitt verður við neyvari greiningum av vindmátingunum í økinum. 

Nú verður arbeitt við at fyrireika uppseting av eini minni vindmastur afturat longur niðri og eystari í haganum omanfyri Porkeri.

So skjótt ein hóskandi staðseting til vindmastrina er funnin, og formlig loyvi eru fingin frá m.a. eigarum, kommunu og øðrum myndugleikum, verður masturin sett upp.