Bakkafrost keypt amerikanskt sølufelag

Tað boðar alifyritøkan frá í tíðindaskrivi.

Bakkafrost hevur seinasta áratíggju havt økt fokus á at menna amerikanska marknaðin, og við keypinum av North Landing fer Bakkafrost at hava betri marknaðaratgongd og fer at kunna bjóða breiðari tænastu til kundarnar í einum av størstu marknaðunum av laksi í heiminum, skrivar fyritøkan.

North Landing er eitt amerikanskt sølufelag, sum selir laks á amerikansku eysturstrondini. Søluskrivstovan við bæði køli- og frysti goymslu er í Clifton, New Jersey.

'North Landing var fyrsta amerikanska felagið, sum innflutti feskan laks úr Føroyum, og hevur verið kundi hjá Bakkafrost í meiri enn 10 ár. 36 fólk eru í starvi hjá North Landing.

Bakkafrost keypir allan partapeningin í North Landing, og keypið væntast at verða endaliga góðkent 25. mai.

North Landing verður skipað sum eitt sjálvstøðugt dótturfelag hjá P/F Bakkafrost. Øll handils- og viðskiftaviðurskifti við North Landing áðrenn og aftan á keypið verða óbroytt. North Landing fer at bjóða somu vørur og tænastur sum áðrenn keypið.

18 % av søluni av laksi hjá Bakkafrosti í fjør fór á amerikanska marknaðin. 

Sølan gav Bakkafrosti 520 milliónir krónur.