Vilja hava Netanyahu ákærdan fyri svik og mutur

Á triðja sinni í ár mælir løgreglan í Ísrael til, at Benjamin Netanyahu, forsætisráðharri, verður ákærdur fyri svik og fyri at hava tikið móti mutri. Tað skrivar New York Times.

Hesaferð snúgva ákærurnar seg um, at Netanyahu skal hava latið almennar tænastur til eitt fjølmiðlasamtak afturfyri at hava fingið rósandi umrøðu sum tøkk fyri tænasturnar.

Ákæruvaldið skal nú taka støðu til tað málið, umframt tvey onnur mál.

Verður niðurstøðan, at ákæra skal reisast, so verður tað fyrstu ferð, at eitt revsimál verður reist móti einum sitandi forsætisráðharra í Ísrael.

Netanyahu noktar seg sekan í ákærunum.

Kona hansara, Sara Netanyahu, er í løtuni ákærd fyri at hava misnýtt almennar pengar til at hava fingið kendar kokkar at matgera í almenna sætinum hjá forsætisráðharranum, hóast har longu er ein alment løntur kokkur í starvi.