Tilmæli um hvussu børn fáast at lesa meira

Ein kanning, sum varð gjørd í trimum árgangum í fólkaskúlanum undanfarna skúlaár, vísti, at føroysk børn lesa alt ov lítið.

Nú hava Turið Kjølbro, Marjun Ziskason, Lydia Didriksen og Sissal M. Rasmussen, sum fingu kanningina í lag, eisini gjørt eitt upprit um, hvussu børn fáast til at lesa meira.

Í uppritinum, sum eitur "Føroyar lesa 2020", eru 12 tilmæli um ítøkilig átøk. Tær fýra mæla til, at ein nýggj, meira umfatandi kanning verður gjørd. 

Fleiri bøkur skulu gevast út

Millum annað eigur at verða kannað, hvussu tímarnir í føroyskum í grunddeild og miðdeild verða gagnnýttir. Mælt verður til, at námsfrøðingar og lærarar fáa eftirútbúgving í lesihegni.

Nógv fleiri bøkur skulu gevast út, skúlabókasavn skal vera í hvørjum skúla, og tey, sum longu eru, skula uppraðfestast, og skipað lesing skal verða í fólkaskúlanum.

Turið Kjølbro, Marjun Ziskason, Lydia Didriksen og Sissal M. Rasmussen mæla til at fyrireika málrættað og landsumfatandi lesiátak næsta ár til frama fyri øll í Føroyum.  

Tilfar skal talgildast

Tær mæla eisini til at varpa ljós á lesigleði í almenna rúminum og, at alt tilfar, sum hevur áhuga hjá yngri og eldri børnum, verður savnað á einum barnaportali. 

Kannast skal, hví heilir flokkar í fólkaskúlanum hava jaligan hugburð og aðrir neiligan til lesing. Eitt tilmæli er um lesikanning skúlaárið 2021-2022 eftir sama leisti sum kanningin í farna skúlaári.

Eitt annað tilmæli er at talgilda tilfar til pallar, sum børn brúka, og tær fýra mæla eisini til at heiðra barnabókina við einum árligum degi.