Alment samstarv um skúlanoktan á veg

Tað sigur Hanna Jensen, landsstýriskvinna, sum hevur svarað spurningnum frá Jónleifi Johannesen, løgtingsmanni, um fyribrigdið skúlanoktan.

Børn eru, sum ikki brúka fólkaskúlan ella frískúlar. Hagtølini siga, at í 2016 játtaði Sernám 44 umsóknum um heimaundirvísing ella sjúkraundirvísing.

Níggju umsóknir vóru aftirvendandi. Í 2017 vóru 51 umsóknir játtaðar, átta afturvendandi, og í fjør vórðu 35 umsóknir játtaðar, fimm vórðu afturvendandi.

Eingin gransking

Hanna Jensen sigur, at eingin gransking er gjørd í Føroyum um skúlanoktan. Men nøkur tvørfaklig og tvørgeiralig átøk eru.

Landsstýriskvinnan nevnir Lopfjølina í Tórshavnar kommunu. Hon er samstarv millum kommununa, Sernám og skúlaverkið. Henda verkætlan verður eftirmett í løtuni. 

Eftirmetingin verður brúkt til at meta um, hvørji neyðug stig eiga at verða tikin fyri at skúlanoktanin minkar. Barnaverndirnar eru eisini við, tá talan er um skúlanoktan.