Tjóðveldi: Nú skal loysingin fremjast í verki

Enn eru øki í landinum, sum ikki fáa sín lut í teimum virðum og tí ríkidømi, ið verður skapt. 

Tað sigur Tjóðveldi í yvirlýsing frá flokstinginum í gjár.

- Vit mugu ásanna, at enn hava ikki allir borgarar í landinum somu møguleikar, hóast teir hava somu rættindi. Hetta mugu vit loysa, stendur í yvirlýsingini.

Samferðslukervi og samhaldsfesti

Samferðslukervið er okkara týdningarmesta amboð at tryggja, at vælferð og møguleikar kunnu koma øllum borgarum til góðar. 

Bara við at bøta um samferðslukervið, eisini til smáplássini, kunnu vit tryggja veruligt samhaldsfesti millum fólk og øki í landinum. 

Tað er ein tjóðaruppgáva at loysa, sigur Tjóðveldi.

Flokkurin sigur, at sum eitt av heimsins ríkastu londum er tað okkara skylda, ikki bara at vera við, men eisini at slóða fyri, tá ið ræður um varandi orku og náttúruvernd.

- Vit vilja seta munandi størri ferð á skiftið til eitt samfelag, sum burturav dúvar upp á varandi orku, og gongur á odda at verja margfeldið í náttúruni, stendur í yvirlýsingini. 

Loysingin

Tjóðveldi sigur, flokkurin fer til løgtinsval við kravi um, at loysingin verður framd í verki. 

Løgregla, rættarskipan og dómsvald skulu yvirtakast, og blokkstuðulin skal niðurlagast, stendur m.a. í yvirlýsingini frá flokstinginum hjá Tjóðveldi.