Tig og koyr bil byrjar í morgin

Ráðið fyri Ferðslutrygd vil steðga gáloysni í ferðsluni. Tað vil siga at steðga øllum tí, tú gert í bilinum, sum einki hevur við koyringina at gera.

Ráðið fyri Ferðslutrygd leggur serliga dent á telefonnýtsluna í hesum átakinum, at tosa í telefon, skriva sms boð og annað, meðan ein koyrir bil.

Eingi hagtøl eru

Eingi hagtøl eru fyri, hvussu nógv ferðsluóhapp- ella vanlukkur eru orsakað av gáloysni, tí tað verður ikki skrásett.

Men sambært eini Gallup-kanning, sum Ráðið hevur umbiðið, siga 85 prosent av teimum spurdu, at gáloysni hevur stóran týdning fyri talið av álvarsligum ferðsluvanlukkum.

Meira enn sætti hvør av teimum spurdu sigur seg tosa í handhildna telefon, meðan tey koyra í minsta lag tvær til fýra ferðir um vikuna.

Løgreglan verður partur av átakinum og fer komandi tríggjar vikurnar at gera kanningar av telefonnýtslu í ferðsluni.

Hava gjørt slikkipinnar til átakið

Serligir slikkipinnar við boðskapinum Tig og Koyr eru gjørdir til endamálið.

- Vit lata slikkipinnarnar við einum skálkabrosi, tí so stappar mann slikkipinnin í munnin, meðan mann koyrir. Koyr, meðan tú koyrir bil, tig og ikki tosa í telefon, sigur Lovisa Petersen Glerfoss.

Ráðið fyri Ferðslutrygd hevur boðið kommununum at luttaka í átakinum. 15 kommunur hava játtað at vera við at lata slikkipinnar og klisturmerki og harvið deila boðskapin út.