Svartkjaftur frá í fjør fluttur til í ár

Nú ber til at fiska svartkjaft, sum ikki bleiv fiskaður í fjør.

Fiskimálaráðið hevur broytt kunngerðina um at fiska svartkjaft í ár.

15.601 tons eru løgd afturat kvotuni hjá føroyskum skipum, sum annars var 319.307 tons.

Tey 15.601 tonsini eru flutt frá 2018.

Í mesta lagi tíggju prosent av kvotu, sum ikki varð fiskað í fjør, kann flytast til í ár.

Føroysk skip kunnu nú eisini fiska svartkjaft í íslendskum sjógvi, eftir at londini hava gjørt avtalu um sínámillum fiskiskap.

Rætturin at fiska 70.643 tons av svartkjafti er settur av til uppboðssølu í ár í staðin fyri tey upprunaligu 68.193 tonsini. Stívliga 50.000 tons eru longu seld á uppboði.

34.536 tons eru til menningarkvotur. Tað talið er ikki broytt.

Sløk 7.800 tons eru nú sett av til vinnuligar fiskiroyndir. Freistin at søkja er flutt frá 14.januar til 14.mai.