Tveir nýggir flokkar á løgtingsvalinum

Føroyaflokkurin hevur nú fingið endaliga góðkenning til at bjóða seg fram til komandi løgtingsval.

Heilsu- og innlendismálaráðið hevur kannað undirskriftirnar, sum flokkurin lat ráðnum tann 5. juli. Ráðið kann staðfesta, at 812 av undirskriftunum lúka ásettu treytirnar. 

Sostatt lýkur flokkurin treytirnar í § 15, stk. 3 og 4, í løgtingslóg nr. 49 frá 20. juli 1978 um val til Løgtingið og hevur rætt at luttaka í komandi løgtingsval

Arbeiðið steðgaði upp

Tað er eitt gott ár síðani at Hjalmar Zachariassen fór undir arbeiðið at savna undirskriftir, men arbeiðið steðgaði upp, tí Hjalmar Zachariassen gjørdist uppstillaður fyri hin nýggja flokkin "Framtakið fyri rættinum at velja Kannabis." 

Men seinni fór Hjalmar Zachariassen úr aftur Framtakinum og fór undir arbeiðið at stovna Føroyaflokkin aftur.

Nú Føroyaflokkurin hevur fingið góðkenning er eisini greitt, at tað verða níggju flokkar, sum stilla upp til løgtingsvalið. Nýggi flokkurin "Framtakið fyri rættinum at velja Kannabis" hevur frammanundan eisini fingið góðkenning at stilla upp.