56 fleiri í Suðuroy

56 fólk fleiri búgva í Suðuroynni nú enn fyri einum ári síðani. Munurin er 1,2 prosent.

Tvøroyrar kommuna hevur kunngjørt, hvussu nógv fólk búgva í Suðuroynni í dag og, hvussu nógv, fólkini vóru 26.august í fjør.

Fólkavøkstur í fýra kommunum

Í dag eru 4.638 fólk skrásett at búgva í Suðuroynni. Sjey kommunur eru í Suðuroynni.

Fólkavøkstur hevur verið í fýra kommunum, og fólkatalið er minkað í trimum. Nógv tann størsti vøksturin er í Tvøroyrar kommunu. Har eru 48 fólk fleiri enn fyri einum ári síðani.

Vøkstur er eisini í Hvalba, Famjin og í Vági. Í Hovi, Sumba og í Porkeri eru nøkur fólk færri nú enn fyri einum ári síðani.