Nógvur makrelur í norskum sjógvi

Norska fiskirannsóknarstovan kannar makrel og sild og eftir tvær vikur verður boðað frá nógvum makreli og nógvum góðum árgangum, millum annað er árgangurin 2010 sera góður.

Tvey skip, Libas og Eros, gera kanningarnar fyri norsku fiskirannsóknarstovuna. Tey eru ikki liðug enn. Eitt íslendskt skip leitar eisini eftir makreli og sild í íslendskum sjógvi.

Sum heild nógvur makrelur
Føroyar eru somuleiðis við í árligu kanningunum. Og føroyska kanningin endaði fyrr í vikuni. Nótaskipið Finnur Fríði varð leigað til at gera kanningina.

Fyribils úrslitið er, at nógvur makrelur og nógv sild eru í føroyskum sjógvi, munandi meira enn undanfarin ár.

Samanbera útslitini
Hálvan august fara londini at samanbera úrslitini hjá øllum skipunum, sum vóru við í kanningini í summar. Og síðst í august fær ICES niðurstøðurnar og brúkar tær til at gera nýggjar stovnsmetingar av uppsjóvarfiskinum.

ES, sum er við í strandarlandasamstarvinum um uppsjóvarfisk, vil ikki vera við árligu kanningunum hjá Føroyum, Íslandi og Norra.