Øll NATO-londini taka undir við grein fimm í sáttmálanum

Allir 32 stjórnarleiðarar í NATO-londunum - eisini amerikanski forsetin, Donald Trump -  hava skrivað undir eina yvirlýsing, sum tryggjar fulla undirtøku fyri grein fimm í NATO-sáttmálanum, sokallaða Musketer-eiðinum.

- Vit, stjórnarleiðararnir í NATO, eru savnaðir í Ankara fyri enn einaferð at vátta grundarlagið undir samstarvi okkara, stendur í felags yvirlýsingini.

Talan er um ein hornastein í NATO-samstarvinum, og hann staðfestur, at álop á eitt Nato-land er álop á alla verjusamgonguna.

Rutte: Gott samanhald

- Ein sera væleydnaður toppfundur er liðugur, og eg havi eina kenslu av, at samanhaldið er sera gott, segði NATO-aðalskrivarin, Mark Rutte, á tíðindafundi fyri løtu síðani.

- At vera saman við 32 stjórnarleiðarum og merkja samanhaldið, var ein serlig kensla, sigur hann við altjóða miðlar,

- Hesin fundurin hevur víst, at samgongan er sterkari enn nakrantíð, og vit fara at standa saman, til tess at verja øll okkara fólk, segði NATO-aðalskrivarin

Næsti fundur verður í Albania

Næsti NATO-toppfundur verður hildin í Albania, segði Mark Rutte, sambært danska blaðnum, Berlingske Tidende.

Júst nær, fundurin verður, er ikki greitt, men hann verður í Albania.

Hesi boðini koma, eftir at amerikanski forsetin, Donald Trump, hevur funnist at júst Albania fyri ikki at rinda nóg mikið til egna verju.

Spenningur millum Trump og hini NATO-londini hevur eisini havt við sær iva, um toppfundirnir verða sleptir.