Bradley Manning fær dóm í dag

Greitt er, at Bradley Manning ikki fer at verða dømdur eftir strangastu greinini í amerikonsku revsilógini um at hava verið fíggindanum til hjálpar. Tað er hann fríkendur fyri, men revsingin kann gerast nóg hørð fyri tað, tí hann er funnin sekur í at hava brotið njósnara-lógina fimm ferðir, fyri stuldur og fyri at brotið fleiri hernaðarligar fyriskipanir. Tað kann sambært amerikanskari lóg geva lívlanga fongsulsrevsing.

Bradley Manning hevur sagt seg vera sekan ella partvíst sekan í tíggju av 22 ákærum móti honum, og tað merkir, at hann í minsta lagi fer at fáa 20 ára fongsul.