- Tíðindi, mentan og ítróttur
Helle Thorning-Schmidt umskipar stjórnina
![](https://kvf.fo/sites/default/files/styles/grein-ovasta-mynd/public/helle_thorning-smidt.jpg?itok=QnnIwJa0)
Umskipanin ber m.a. í sær, at Mette Gjerskov, matvørumálaráðharri, sum m.a. hevur viðgjørt sildatrætuna millum Føroyar og ES, fer burtur úr stjórnini. Nýggjur matvørumálaráðharri verður partakvinna hennara í sosialdemokratiska flokkinum, Karen Hækkerup, sum hevur verið almannamálaráðharri.
Henrik Sass Larsen
Sambært donskum miðlum verður Henrik Sass Larsen, sum hevur verið formaður fyri tingmanningina hjá sosialdemokratunum, nýggjur vinnumálaráðharri. Annette Vilhelmsen, forkvinna í SF, sum hevur havt henda ráðharrasessin, verður almannamálaráðharri eftir Karen Hækkerup.
Henda ráðharrastovan verður víðkað til eisini at umfata integrasjónsmál.
Nýggjur verjumálaráðharri
Nicolaj Wammen úr sosialdemokratiska flokkinum, sum hevur verið evropamálaráðharri, verður verjumálaráðharri. Partamaður hansara í verjumálaráðnum, Nick Hækkerup, verður nýggjur evroparáðharri og handilsmálaráðharri.
Pia Olsen Dyhr úr SF, sum hevur verið handilsmálaráðharri, avloysir Henrik Dam Kristensen sum flutningsmálaráðharri. Hann fer eisini burtur úr stjórnini, og verður formaður fyri tingmanningina hjá sosialdemokratunum.
Søvndal heldur fram
Villy Søvndal úr SF heldur fram sum uttanríkisráðharri, og heldur ongar broytingar verða gjørdar í ráðharrasessunum hjá teimum radikalu.