- Tíðindi, mentan og ítróttur
Sýrialand: Andstøðan vil hava vesturheimin at leypa á
![](https://kvf.fo/sites/default/files/styles/grein-ovasta-mynd/public/syrialand.jpg?itok=vFq_tUDu)
Størsti andstøðubólkurin í Sýrialandi, SNC, heitir á vesturheimin um at leypa á stjórnardeildir hjá Assad, forseta, hóast leiðslan í Damaskus sigur seg vera til reiðar at útflýggja síni kemisku vápn, skrivar AP-tíðindastovan.
SNC, sum umboðar allar andstøðuflokkarnar, sigur, at avtalan, sum Sýrialand og Russland hava gjørt um kemisku vápnini, fer bert at draga tíðina út og gera støðuna í landinum uppaftur verri.
Álop steðgar kreppuni
Eitt álop kann steðga kreppuni í Sýrialandi alt fyri eitt, tí Assad, forseti, hevur mist valdið á 60 prosent av landinum, sigur ein talsmaður fyri SNC við amerikansku sjónvarpsstøðina, CNN.
Hann mælir Obama forseta til at leypa á, sama hvat amerikanska kongressin sigur um at leggja uppí við hermegi.
- Ikki fyrr enn hótt varð við at leypa á, broytti sýriska stjórnin støðu. Frammanundan væntaði eingin nakra politiska loysn, sigur talsmaðurin fyri sýrisku andstøðuna við CNN