Krevja føroysku kvotuna

Norska reiðarafelagið, Fiskebåt, vil hava toskin og hýsuna, sum føroyingar plagdu at fáa í norskum sjógvi.

Eingin fiskirættindasáttmáli hevur verið millum Føroyar og Norra í trý ár, tí semja er ikki um makrelin.

Og Fiskebåt vil ongan sáttmála hava næsta ár heldur, so leingi heldur eingin semja fæst um norðhavssildina.

Felagið mælir frá at samráðast við Føroyar um sáttmála fyri 2014.

Reiðararnir vilja, at skipini, sum plagdu at fiska botnfisk í føroyskum sjógvi, fáa toskin og hýsuna, sum føroyingar plagdu at fáa frá Norra í Barentshavinum.

Skal sáttmáli kortini gerast við Føroyar, skal hann vera liðugur fyri nýggjár, tí annars fæst ikki full nytta burtur úr honum.

Í 2009 og 2010 kom sáttmálin við Føroyar ikki fyrr enn eftir nýggjár.

Tá fiskaðu norsku skipini bara ein triðing av longukvotunu og helvtina av brosmukvotuni, sigur Fiskebåt.

Føroyar hava heldur ongan fiskirættindasáttmála við ES longur.

Og landsstýrið hevur onga ætlan um at samráðast við Norra og ES um fiskirættindasáttmálar fyri 2014.

Men strandarlandasamráðingar vera um uppsjóvarfiskin.