Grønlendskt skip landar sild í Noregi

Grønlendska nótaskipið Polar Amaroq er í Lødingen í Norra við 750 tonsum av sild, sum eru fiskað í føroyskum sjógvi.

Sildin er fingin eysturi við markið millum Føroyar og Norra. Og í norsku vinnuni fegnast tey um, at skiparin á Polar Amaroq hevur sagt, at sildin er á veg í norskan sjógv við fullari ferð, skrivar Fiskeribladet Fiskaren.

Hetta merkir, at norski flotin skjótt kann fara at fiska sild. Hjá nógvum skipum er makrelkvotan uppi.

Sambært skiparanum á grønlendska nótaskipinum er nógv sild at fáa, og sildin er stór.

86 prosent av lastini hjá Polar Amaroq er stór sild, miðalvektin er 386 gramm.

Nú eru bæði fiskifrøðingar og fiskimenn í Norra spentir eftir at fáa at vita, um sildin, sum verður landað til Norway Pelagic í Lødingen, hevur fingið nóg mikið at eta í kapping við makrelin.